العنوان : أبو شلبك في المقهى
المكان : مقهى عربي في ميسيساغا – اونتاريو
المشاركون : أبو شلبك وأبو العبد وأبو حسن وأبو جورج وأبو حيدر .
الزمان : منتصف نيسان ابريل 2019
المناسبة : دساتير و انتخابات
اللغة المستخدمة : العربية الفصحى ولهجات عربية .
كتب : محمد هارون .
****
مقهى عربي بميسساغا حيث دخان الشيشة يغطي المكان وأغنية أم كلثوم لسه فاكر في الخلفية .
ابو شلبك مع الأصدقاء العرب حول طاولة واحدة
ابو شلبك : اهلا وسهلا بالشباب زمان عنكم والله .
ابو العبد : يازلمه امبارح كنا مع بعض !!
ابو شلبك : زمان عنكم بقهوة بندفع فيها مصاري..,ومن فترة قريبة كنا بندخن وبنشرب شاي وبنلعب ورق شدة ببلاش بالبيت الفلسطيني .
ابو حسن : يا عمي زمن أول حوّل .. وسمعت انه في دستور معدل في البيت الفلسطيني و تمت الموافقه عليه من جديد .. وفي انتخابات بعد كم يوم .
أبو جورج : يا خيي انا مني فاهم شي .. خبروني شو صاير معكن . انا قرات شوي على الفيسبوك انه في تعديلات جديدة ايجابية على الدستور باشرف من اللجنة المؤقته .. دخلكن، شو هاي اللجنه المؤقتة؟
ابو شلبك : أنا بدي أفهمك شغله مهمه .. هاي اللجنة المؤقتة بتحد من المد الثوري نحو انطلاقة جديدة لتحرير المقدسات وحق العودة وبالتالي يجب ايقافها .
أبو جورج : يا حبيبي طول بطلونك شوي انت فين والناس فين .. المهم سمعت الانتخابات جاي… شو رايكم ؟
أبو شلبك : ان الجماهير التي .. ( يقاطع)
أبو حيدر : حبيب قلبي انتو مدورين القعدة كلش لسولاف عن قصص الخلافات الفلسطينية .. اروح اقعد مع طاولة الحج شكري واخذ نفس شيشة ولما تحلو مشاكلكم خبروني .
أبو شلبك : يعني انتو احسن منا .. ما كلنا في الهم شرقُ .
أبو العبد : اسمعني يا ابو شرقُ .. بقصد يا ابو شلبك حبيبي.. ارجع لسؤال ابو جورج .. باعتبار الدستور الجديد صار والحمد لله .. وجماعة اللجنة المؤقته ماشية أمورهم و داحلين ..
( يقاطعه أبو شلبك ) : قلبي كان حاسسني انهم من جماعة دحلان .. مجموعة ترامبية مرتبطة باجندات خارجية وو.. ( يتدخل ابو جورج )
ابو حسن : الزلمة بيقول داحلين.. يعني ماشيين.. وما جاب سيرة دحلان .. أنت ما صدقت تبلش شمط فينا … وقبل ما تحكي عن الشمط وتتهمني بشي .. أبو شمط صاحبي وما اله علاقة بالموضوع .
أبو شلبك : من الآخر انا نازل للرئاسة !!
ابو العبد : ول ول ول .. يا زلمه انت ما ببتعلم .. انت بانتخابات جروب على الفيسبوك فشلت وحصلت 5 أصوات ومنافسك جاب 500 . اسكت اشرف لك .
ابو شلبك : يعني اللي كانوا في الاول أحسن مني بشو ؟؟.
أبو العبد: اول شي لازم تقرا الدستور اللي بقول انه المرشح يجب ان يكون جامعيا ولديه معرفة تامة بالانجليزية وخبرات كافية في العمل الاداري والنقابي واهم شي يشوف ظروفه هو نفسه عنده وقت كافي للعمل الطوعي .. ياجماعة هذي مسؤولية مش مخترة .
أبو حسن : يسلم تمك عمي أبو العبد . .. الصح صح . ابو شلبك يا صاحبي انت عندك وقت كتير ولكن خبراتك محدودة بهذا الموضوع ومعرفتك بالانجليزي ضعيفة .. انا بشوف انه ما في داعي ترشح حالك .
أبو جورج : انا مبسوط على التعديلات الجديدة وياريت تنتشر لكل عرب كندا .
أبو حسن : بس لو حطوا لجنة حكماء او مستشارين لمتابعة أعمال الادارة المنتخبة كان احسن حتى ما نوقع بنفس المشكلة .
أبو العبد : عموما يعطيهم العافية وخاصة انهم وضحوا ان اسم البيت الفلسطين سيبقى شامخاً وعنوان لادارة المبنى الذي يعود بمعظمه لابناء الجالية والاسم الجديد سيكون للنشاطات والفعاليات والمخاطبات.
أبو شلبك : دخلك شو الاسم الجديد؟
أبو حسن : عشان ما بتحضر الاجتماعات ما راح تعرف شي .. عموماً .. الاسم هو مركز الجالية الفلسطينية الكندية .
أبو جورج : اسمح لي بسؤال من الآخر يا ابو شلبك .. انت سجلت عضوية في البيت الفلسطيني ؟
ابو شلبك : اه .. شو .. نعم !!! .. لأ لأ ما سجلت.. بعدين انت لبناني شو دخلك؟؟ .. على كل حال ما في مشكلة.. بكرا من الصبح بروح بسجل اسمي .
ابو حسن : ابو جورج من عظم الرقبة .. ولعلمك التسجيل انتهى في أخر اذار مارس الماضي .
ابو شلبك : ما حدا خبرني …هاي مؤامرة ضدي من مجموعة دواعش وشيوعيين .
أبو العبد : انت لا بتروح على مبنى البيت الفلسطيني ولا عندك ايميل حتى .. كيف بدك تعرف ؟؟ .
أبو شلبك : انت ما بتعرفني لما كنت في البلد..وكم واحد كان تحت أمري وكم وو…
( يقاطعه ابو جورج ) معلش.. دخيل الصليب .. خيي أنا فرفطت روحي .. خليني اروح على الحق ابو حيدر والعم شكري اخد ارجيله أحسن ما انجلط .
ابو العبد : يا ابو شلبك من كم يوم ابو تفليقة ترك والبشير راح وراه .. خدهم عبرة يا أخي ..خلص انت من الجيل القديم ولازم تسلم الراية لاولادك.. والجيل الجديد أقدر مني و منك على التعامل مع الكنديين .
أبو شلبك : اذا عدنا لأسباب انهيار منظومة القيم السياسية والاخلاقية عند ابو تفيلقة والبشير فان ذلك ..
( يقاطع من ابو العبد )
أبو العبد : من شاء الله اسمحوا لي اروح جنب الباب .. هناك في هوا .
أبو حسن : خدني معك ..
أبو شلبك ( وحيداً ): لن استسلم فانا انسان طليعي مناضل ولن اسمح بالتقهقروالانبطاح ( يرفع صوته ) وانني اعلن للجماهير بانني أرفض ان يتحكم بنا لمة نسوان وشوية أولاد قواريط وو..
( يقاطعه السفرجي في المقهى ): استاذ ابو شلبك.. لو سمحت حرك كرسيك.
أبو شلبك : ليش ؟
السفرجي : لانه خلص بدنا انظف ونسكر!!
ثم يردد أغنية أم كلثوم : لما تسألني أقولك كان زمان … لسه فاكر كان زمان.
انتهت
