العنوان : تكتيك استراتيجي.
المناسبة : أيلول وما أدراك ما أيلول
الزمان : زمن انعدمت به القراءة وكثرت به البوسات والبوستات
المكان : تورونتو
اللهجة المستعملة : فلسطيني على أردني مع بعض العبارات الفصيحة.
مهنة ابو شلبك : كاتب.
***
كتب : محمد هارون
( ابو شلبك على طاولة المطبخ في بيته بتورونتو يكتب .. تدخل ام شلبك زغاريد عليه وهو منهمك )
أم شلبك زغاريد : .. لسه بتكتب؟؟ .. يا زلمه فكرتك بتجهزلنا نفطر مع بعض!! .
ابو شلبك : طولي بالك يا زغاريد .. انا بكتب بشي مهم .
ام شلبك : عارفه .. بس ما حد قاري ورق .. ومهما كتبت من مصايب الكورونا أو حتى مصايب ايلول اللي راحت واللي جاي .
ابو شبلك : هيك عارفة يا ستي البير وغطاه .. وهو هذا قليل يعني ؟؟
ام شلبك : بلاوي ايلول ما بتوقف بسطرين ولا بالف سطر .. ولا بالحداد والبيانات الاستعراضية .
ابو شلبك : زغاريد .. انا مش ناقصك هاتي من الآخر .
ام شلبك : غيّروا اسلوبكم جددوا دمكم جيبوا شباب بدالكم . السوالف وطق الحنك وطعج البيانات ما بطعمي خبز .. خلص قرفنا. .. يا ابن الناس .. عدونا صعب وبدو مواجهة مختلفة… مواجهة استراتيجية.
ابو شلبك : يا حبيبي .. استراتيجي .. استراتيجي .. الله يسهل عليك يا مستعصم يلي قلت: إن كانت الرجال قد عدمت عندكم فأعلمونا حتى نسيّر إليكم رجلاً… انتِ جاي تعلمينا التفكير الاستراتيجي ؟؟
أم شلبك : وليش ما اعلمك .. مش تتعلم التفكير الاستراتيجي أحسن ما تروح وما تيجي ؟؟
أبو شلبك : خطيرة هاي يا زغاريد وهاي زغروته من شانك .. للوللوو يش .
ام شلبك : انا وولادك كنا بنحكي من يومين بالهموضوع، وقالوا انه لازم نتعلم من غيرنا ونعالج ظروف المرحله بطريقة مختلفة .
ابو شلبك : وشو هاي المختلفة يا شجرة الدر.. دري وجودي علينا بها.
أم شلبك : الشباب وانا معهم بنقول .. انه عدونا وامريكا وغيرهم .. مسيطرين فعلا على كل شي ….وكل جماعتنا بيشتغلوا موظفين عندهم …ناهيك عن موظفينهم في الغرب وما اكثرهم .
ابو شلبك : وبعدين هاتي اشي جديد .. احسن طقت مرارتي …
ام شلبك : لازم نبدا من هون من الغرب من امريكا واروبا وكندا ..نتعلم من التجمعات والجاليات اللي كانت زمان صغيرة وصارت هسة تحكم العالم .
ابو شلبك : كيف مش فاهم !!
ام شلبك :لازم نتعلم منهم كل شيء .. مثلا كيف ننشيء مدارس وجامعات و شركات صرافة ..وغيرها كثير ومهم جدا ما تكون هاي الجمعيات مثل هسه اجتماعية او خيرية تعتمد على التبرعات .. لكن وزي ما حكيت لازم تجيب مصاري يعني قوة حقيقية وبتعمل مستقبل … متل ما ساوى الارمن وغيرهم في العالم… العواطف والمواقف التطبيلية ما بتكفي …لازم نشتغل عليها من هون لان الظرف بيسمح .. خلينا نكون نواة …وراح تشوف النتائج.
ابو شلبك : الله غالب.. وربنا معنا.
ام شلبك : والنعم بالله .. ولكن وأعدوا.. وإلا نسيت..
ابو شلبك : شغلتنا طويلة .
ام شلبك : بس الها نتيجة.. اقنع الناس.. اقنعهم انهم بيربحو كثيركثير من المصاري والنفوذ في وقت قصير… قولهم واكتب الهم أنه يحوّلوا هذه الجمعيات الى تجمعات اقتصادية أولا وبعدين اجتماعية وفنية وغيره.
ابو شلبك : دخلك مثل ايش مراكز اقتصادية يا بنت شومان !!
ام شلبك : خليك تمسخر .. لعلمك انا بلخص الك كلام الشباب.. وجوابا على سؤالك : مراكز اقتصادية مثل مراكز للتسوق وروضات و مدارس و جامعات متميزة علمية وكلها باسعار مخفضة .. لكن رابحة وهيك البداية بخطة استراتيجية بسيطة وراح تشوف النتائج ….كل المشاريع الكبرى والعظمى بدأت بفكرة صغيرة.
ابو شلبك : والله يا زغاريد .. كلامك جواهر بس جماعتنا مش طايقين حالهم والله وكيلك خاشين سلخ وعضعضة بلحم بعضهم البعض.
ام شلبك : ما ظل وقت للخلافات نكون او لا نكون .
ابو شلبك : شكسبير حبيبي .. وشو كمان ؟
ام شلبك : لازم نستثمر بالمصارف والعقارات والخدمات المتعلقة بالتكنلوجيا والانترنت فقط …والابتعاد عن المصانع والزراعة …
ابو شلبك : هاي الأخيرة ما فهمتها.. ليش نبعد عن الزراعة والمصانع ؟؟
أم شلبك : نبتعد عن الصناعة والزراعة لأنها تبتعد عن مراكز المال والنفوذ والانتباه ..هيك غيرنا عمل لان عددهم كان قليل مثلنا الان و في مجتمع كبير مختلف عنهم .
ابو شلبك : والله فكرة .. وراح نعمل مصانع دوا ومصانع سيارات ودبابات واسلحة و..
ام شلبك ( تقطعه ) : طول بالك يا زلمة ..أنت أول ما شطح نطح.. احنا بدنا نمشي شوي شوي عشان نعرف كيف نمشي لنوصل صح.
ابو شلبك : ذكرتيني بصاحبي الدكتور سالم اللي دايما بيقول.. اشتروا اسهم بشركات في سوق الاوراق المالية اسسوا مكاتب وشركات قانونية ومصارف صغيرة ومتعددة واحزاب قوية صغيرة متنافرة تدعم الاحزاب الحاكمة المتنافسة …مثلا يجب ان يكون منا يمينيين ويساريين اي حزب يحكم يكون لنا حصة فيه .. ليش ما يكون عنا تروتسكي ويكون عنا ورتشيلد، لكنهم جميعا يدعمون بعضهم في كل المواقف ولو بالسر.
ام شلبك : يا سلام عليه صاحبك سالم هاظا .. اول مرة بسمع كلام من اصحابك غير اسعار المعسل والشارورما. والله يا بعلي بنتك لواحظ حكت معي وسألتني عن حزنك لما شافتك متنيّل من أول هذا الشهر فخبرتها عن وضع امتنا هناك وردت عليّ وقالت نفس كلام صاحبك سالم واكدت انه من الضروري ان نتعلم من ولاد عمنا خطوة بخطوة ..يعني العمل باستراتيجبة مستمدة من التجارب اللي نجحت ولازالت تنجح ..وختمت الحكي.. انتوا ماضيعتوا البلاد الا لانكم بتحملوا عقلية الفلاح العاطفي والعاجز الفقير .
ابو شلبك : بس احنا عنا بترول وو…
ام شلبك ( تقطعه ) : انتو مين ؟؟ من شان الله، وكأنه ما حكينا شي.. انت ما بتتعلم… البترول مش الك وأبو عرب كل واحد همه على قده .. انت وعضلاتك ومخك وبس والباقي خس، صح صح من شان الله بيكفي !!
