شباك ابو شلبك.
العنوان: حوار شلبكي طائفي
اللغة المستعملة اليوم: الفصيحة وبعض العامية.
نشاط أبو شلبك: ناشط فيسبوكي.
المناسبة: خرابيط مشلبكة
الزمان : صيف 2024
المكان : مقهى بيت جدي بميسيساغا- اونتاريو
كتب: محمد هارون
***
( أبو شلبك يلتقي بأحد الشباب العرب في مقهى بيت جدي بميسيساغا ويبادره بالسؤال للتعارف ).
أبو شلبك: أنا صابر أبو شلبك … وحضرتك ..الاسم الكريم؟.
الرجل : أنا الدكتور هاشم .
أبو شلبك : أنت سُني ؟
د. هاشم: أنا مش سُني .. أنا باطني .
أبو شلبك : مِلّة كُفر !!
د. هاشم : ليش ؟
أبو شلبك : لأن كل معتقداتكم ودراساتكم تناقض الشريعة.
د. هاشم : نحن ليس لنا علاقة بالشريعة .
ابو شلبك : طبعاً فأنتم مصدر الفتنة والفضائح والفظائع .
د. هاشم : يا عم أنت محشش والاّ ..( يقاطعه أبو شلبك )
أبو شلبك : أنتم من الحشاشين والزنادقة .
د. هاشم : يا حبيبي .. احنا جماعة بنعالج أمراض القلب والمناعة والسرطان والكلى وغيره .
أبو شلبك : طيب أنا شو علاقتي بالموضوع ؟
د. هاشم: أنت سالتني أنت سُني، رديت عليك وقلت لك أنا طبيب باطني وحضرتك بهدلتني !!
ابو شلبك : سؤالي واضح أنت سُني ولا شيعي ؟
د. هاشم : سؤالي أنا الك : هل أنت في كندا وبسنة 2024 وبتسأل هذا السؤال ؟
أبو شلبك : شو المشكلة فالفرس الشيوعيين الشيعة أعداء لنا ( يقاطعه د. هاشم )
د. هاشم : الفرس قومية والشيوعيين والشيعة اشي تاني ..( يكلم نفسه ) أنا مع مع مين بحكي !!
سلام يا صاحبي.. هذا المقهى أدخله أول وآخر مرة باي باي . ( يغادر )
صاحب المقهى درويش يراقب، ثم يدخل مسرعاً : أبو شلبك. . دخيلك روح روّح عل بيتكم .. وانا ببعت لك الشيشة لعندك للبيت وعلى حسابي … هذا الزبون الخامس اللي طفش منك خلال يومين . الله يخليك بلا فلسفة حلّ عنا .
أبو شلبك : يا عمي عم بنخلق جو ثقافي وبيئة حضارية للنقاش وبنتابع أقوال الفلاسفة ومنهم آلان ديلون، واللي حكاه بكتابه نظام التفاهة.
صاحب المقهى درويش : أنت يا بو شلبك بتذكرني ببعض جماعة الفيسبوك اللي داخلين تكفير وتخوين وتحليل وتطعيج وفلسفة وكلام فاضي لا بودي ولا بجيب.. وبعدين كتاب التفاهة لألن دونو مش لألن ديلون … فالله يرضى عليك يا حبيبي، خفف وخف.
أبو شلبك : شو يعني ؟
صاحب المقهى درويش : يعني روح على بيتك من شان الله …وقبل ما تمشي بنصحك تبعد عن الفيسبوك.. وأترك الفلسفة لأصحابها … يالله بدنا نسكّر الظهر اليوم..منيح !! .
ابو شلبك : ليش .. أنت صاحب قهوة وشغلك تستقبلني انا وغيري .. وأنت مجبور تخدمني كمثقف طليعي مش تطلعني من القهوة !!.
صاحب المقهى درويش : يا باشا .. أنا معي دكتوراه بالفلسفة مش أهبل … لذلك راح اترك القهوة والثقافة الك ولجماعة الفيسبوك … ورايح اشتغل بمزرعة دجاج أحسن لي .. الله يهديك هديتني .
أبو شلبك : طيب شو بالنسبة للمهدي المنتظر ؟
درويش يمسك رأسه ويصرخ : وين الباب؟؟
انتهى الحوار .
***
ملاحظة : وجدت الشرطة الكندية رجلا (عرفته فيما بعد بانه درويش صاحب مقهى بيت جدي) وجدته في أعلى إقليم نونافوت النائية يشعل ناراً ومعه سبع دجاجات وديك.. ويغني وحيداً :
مشربش الشاي اشرب
أزوزه أنا
مشوفش الفيس أنا
وما فيش أبو شلبك هنا !!
***
