من سلسلة شباك أبو شلبك.
العنوان: سهرة اجتماعية بعد طول انتظار.
اللغة المستعملة اليوم: الفصيحة وبعض العامية.
نشاط ابو شلبك: مُختار .
المناسبة: البحث عن زوجة بالحلال .
المكان : منزل ابو شلبك في ميسيساغا .
الزمان : نهاية كانون ثاني – يناير 2025.
كتب : محمد هارون .
****
بعد أن إنخفض ضجيج المعارك وأعلن عن وقف اطلاق النار في غزة ولبنان التقط ابو شلبك أنفاسه وبدأ يعود الى الاستماع ولو مؤقتا لمشاكل إجتماعية ومحلية أخرى وأهمها ” الشباب بدها تتجوز “.
في بيت ابو شلبك ….
أم شلبك : تأخروا اصحابك على السهرة .
ابو شلبك : شوي وبيجوا ..الطقس موت برد .. والله زمان عن السهر .. بعد اكثر من سنه سهر على التلفزيون على الأخبار الصعبة .
أم شلبك : أن شاء الله يكون وقف الطخ وأخبار الصفقة مشيت صح. على كل حال ..ربنا يسهل ونخلص احنا وأهلنا من الهم الكبير اللي قاعد على نفسنا كلنا .
أبو شلبك : يا ستي هذا الهم على المسخمين بس.. وفي ناس قاعد على قلوبهم زي العسل .. على كل حال العدو غدار وجماعتنا لازم يكونوا صاحيين… ( صوت جرس الباب).. وصلوا الشباب .. انا بفتح لهم… ( يفتح الباب ) يا مرحبا يا هلا … زمان عنكم . يا مرحب ابو الشكر ومدامته عبله و سلامات د. سليم ومعه سات الستات سعاد … تفضلوا تفضلوا وأخيرا..أهلا أحلا أبو صفوح وحرمه ..منور بعد الثورة … يلا فوت بنحكي لما تقعد… وين مينا عنكم؟؟.
أبو صفوح : أول شي مينا ابنه ايهاب اجى من مونتريال فجأة .. وانت سيد العارفين مين لاقى أحبابه نسي اصحابه …. وبعدين ما احنا كل يوم بنحكي تلفونات … وزي ما حكيت لك مبارح عن وضعنا في الشام .. الأمور بدها صبر حتى يدوب الثلج ونشوف المرج.
شكري : أه تلج ومرج ده.. مش فاهم.. يعني انت عايز تشتم مين؟؟ اللي راح والاّ اللي الجاي؟؟ .
أبو صفوح : ما بدي أشتم حدا عشان ما حدا يشتمني … وبعدين انتو بمصر خليكم على موقفكم ها، وما تطلعوا أي غزاوي بره بلده.
شكري : خلاص أنا حعمل شوية تلفونات وأنهي الموضوع .
د. سليم : كبير يا أبو الشكر .
شكري : أنت بتتريق عليّ يا سلومه. انت خليك بمشاكل لبنان..بس يا ريت تقول لنا اه آخر أخبار هناك؟
سليم : احنا اللبنانية هلق عنا رئيس وحكومة جديدة وما بدنا نسب حدا.. خلينا نستنا شوية . بيكفي يلي بنشوفه على السوشيل ميديا!!
أبو شلبك: على صفحات السوشيل ميديا في ناس بتكتب وكأنها بتكتب -العفو منكم- على حيطان المراحيض العامة … يا جماعة بالمناسبة عندي سؤال : شو الفرق ما بين الكتابة على حيطان المراحيض العامة وعلى صفحات الفيسبوك؟.
شكري : أنا أقولك الفرق .. على حيطان المراحيض العامة ما حدش بيعرف الكاتب أم على السوشيل ميديا فصاحب الكلام معروف وقاعد بالصورة يتحدى ومتنح!!.
ابو صفوح : أما وجه الشبه فالاثنين وعلى الغالب بيحكوا أي كلام والسلام .. لا موضوع ولا لغة ولا ثقافة ولا عمق.. وممكن كلامهم يخلق مشاكل بين ولاد الجالية الواحدة والبلد الواحد ..اشي مقزز .
شكري : فعلاً شئ مُقرف.. من الاخر طز فيهم ..أنا مش رايح أي حمام عام ولا فاتح صفحة فيسبوك.
عبلة زوجة شكري : ملاحظين يا جماعة أنتو بس بتتكلموا كلام ملغوم وبتأفورو المواضيع وبتشتموا .. كل يوم شتيمة جديدة .. وكل خبر وله شتيمه بتعته.
ام شلبك : شوفوا يا حبايبي .. بكفي اللي بنشوفه على الفيسبوك من ردح وقدح .. ترى احنا اليوم باجازة من الأخبار والردح على بعض . فربنا يرظى عليكوا شوفوا موضوع تاني نحكي ويفيدنا هون .
أم صفوح : أه والله.. حاجي بقى.
ابو شلبك : ملحقين على الهم .. ام شلبك بدها بتضيفكم اليوم .. أطيب مسخن وقبلها بنسولف وبنحل قضايا الوطن ومشاكل الجالية .
سعاد ( زوجة د.سليم ): كلك زوء استاز ابو شلبك.. بعدين اتفقنا الضيافة تكون على الخفيف… لكن المسخن بده شغل كتير … بكفي فرم البصل!!.. رح نتعبكم اليوم.
ام شلبك: ولو … أهلا وسهلا انتو تعالوا كل يوم والكم أطيب أكل .
دكتور سليم: يا أبو شلبك .. ياعيوني سيبك من الطبخ والنفخ .. انت عامل مختار الحارة هوني.. شو عم بتحل مشاكل هالأيام؟؟
أبو شلبك: والله اجت عندي اكم من حالة من الشباب الجدد و معظهم لاجئين أو طلاب عرب طبعا وبدهم يتزوجوا رسمي.
ابو صفوح: يا بخت من وفق الراسين بالحلال.
شكري : عايزين يكسبوا الجنسية ؟
أبو شلبك : ممكن .. بس في شباب نيتهم طيبة وقادرين على فتح بيت واحنا لازم نساعدهم .
د. سليم : في اكثر من حل للتعارف بين الشباب والصبايا وبطريقة بتكفل كرامة الكل.
أبو صفوح : مثل شو ؟
د. سليم : الجمعيات العربية الكندية واللقاءات في الاحتفالات والمعارض والرحلات والزيارات العائلية .. في طرق عفيفة كثيرة .. المهم النية الشريفة.
سعاد: كمان الطريقة التقليدية من خلال الزيارت الستاتية على البيوت.
د. سليم : ياسعاد هيدي الطريقة خلصت انتهت .. أصلا ما في ستات بالبيوت كلهم بالشغل بره البيت .
أم صفوح : ربك يعين .. وعلى فكرة في ” جروبات ” على السوشيل ميديا بتشتغل على الزواج وبتيسر الأمور بين الزلام والبنات.
أم شلبك : والخطابات من ستات البيوت .. شو رأيكم؟
سليم : أنا سمعت قصص مختلفة عنهن .. منهم بتشتغل من شان الفلوس ” كمشن” يعني ..ومنهن لله والوطن… لكن القصة بدها صحيان وانتباه .
شكري : في حاجة مهمة جداً .. تتجوز وتفتح بيت الأيام دي مش ممكن.. حاجة صعبة جداً.. انتو شايفين الغلا بكل الحاجات اللي بنشتريها… كله من ترودو وحزبه الفاشل .. دمر البلد بالمهاجرين بتوعه .
أبو صفوح : كلامك مش مزبوط ، ترودو وحزبه ما لهم علاقة بخراب العالم .. الكورونا وحرب اوكرانيا هما السبب ولا تنسى انه بعهد ترودو جاب مهاجرين مدمرين أصلاً في بلادهم وجابهم لهون وكانوا ناس محترمين… مثلي أنا .
شكري : ركز معاي يا ابو صفوح .. ترودو فاشل وعشان كده ..استقال ,,, ( تقاطعه عبله زوجته ) .
عبلة : وبعدين يا جماعة ..احنا كنا بنتكلم بحته وانتو بقيتوابحته تانية خالص!! .. خلينا بموضوعنا .
أبو شلبك : فعلا خلينا بمشاكل المهاجرين وخاصة الشباب في الشغل والاندماج والزواج والطلاق وكيف بدنا نساهم بحلها .
سليم : أنا خايف يصير فيهم زي زميلنا عمر الشاب العراقي يلي كان معنا في مدرسة اللغة.
سعاد : شو صار معه ؟
سليم : رجع على بلده .. الشاب شاطر بالانجليزي ماشاء عليه لكن مش كافي ما لاقى شغل يناسبه . فقرر يرجع على بغداد ..ومن خلال مرسلاتي معه على فيسبوك بيقول أنه تجوز قريبته و الأمور ماشية بصعوبة.. بس أحس من كندا.
أبو شلبك : اللي عند أهله على مهله .. شوفوا من فترة حكى معي زلمه محترم شرواكم من أخوتنا العرب وبدون زكر أسماء .. بدو السترة لبنتوا وعلى قولة المثل “اخطب لبنتك ولا تخطبش لابنك” وطلب مني أشوف الها عريس من الشباب العربي اللي هون وطبعا يكون محترم وابن ناس.. وفعلا كان عندي شاب بدو يتجوز ووضعه كويس وأهله في البلاد محترمين .. المهم مشينا في الموضوع ولكن الأمور ما زبطت !!
الجميع : خير.. ليش؟؟
ابو شبك : الشاب ما عجبته البنت .. قال مش هاي اللي بفكر فيها !!.. حكينا معه طيب يا عمي اقعد معها تعرف تناقش سولف معها البنت جامعية وعلى خلق .. ما مشيت الأمور .. والزواج قسمة ونصيب.
شكري : أنت يا ابو شلبك عندك حاجة ما قولتهاش!!.
ابو شلبك: يا سيدي بدو اياها شقرا وعينها خضر!!.. طيب من وين اجيب له شقرا وعينها خضر!!
وشاب تاني بالعكس، الأب طلب راس غليص من شان يجوز بنته وحاولنا معه على الفاضي .. وبالاخر الشاب والبنت لأنهم بحبوا بعض.. فتركوا اهلهم وراحوا يعيشوا في ولاية كشكوان .
أم شلبك : اسمها ولاية ساسكاتشوان.. كأنك جوعان يا بعلي !!.
ابو شلبك : أنتِ خودي الزبده بس واتركي المسميات والفرعيات..هاتي حل للشباب والصبايا اللي بهربوا وبفتحوا بيوت على الطريقة الكندية.
أبو صفوح : ما فهت.
ابو شلبك : زواج مدني .. توقيع في البلدية وخلصنا.
شكري : يعني ما نجحتش باي جوازة ؟
أبو شلبك : نجحت بثلاثة والحمدلله والشكر لمساعدة لأم شلبك، لكن فشلت بتنين .. وربنا يسهل.
شكري : شابوه يا زعيم ..
ابو شلبك : تسلم أبو الشكر .. لكن لسه عنا مشاكل كتيرة.
شكري: أنت فكرتني بحاجة تانية …طيب ازاي نحمي عيالنا من دروس المدارس والروايات اللي بتعلموها في المنهاج التعليمية.
ابو صفوح : والله هذا هم كبير.
سليم : ما تعتلو للهم .. لكن وبنفس الوقت .. الحكاية كبيرة عشان هيك لازم تتنظم ندوات ولقاءات مع مختصين بهاي المواضيع لحلها.
شكري : كمان المساجد والكنايس والإعلام ليها دور كبير ..وطبعا الكل لازم ياخد باله على عياله.
أبو شلبك: بهاي البلد ما في اشي بالغصب.
سليم : يا عيوني خلاصة موضوع الزواج .. لازم الكل يتكاتف من شان نساعد الشباب ليتزوجوا .. الأب والأم والأخ والأخت…. كل واحد عليه مسؤولية حتى نستمر بشكل صحيح.
أبو شلبك : فعلاً بدنا نتعاون ونحب بعض حتى ننجح بالغربة.
أم شلبك : وحتى ننجح لازم ناكل … ولما ناكل لازم يكون الأكل سخن .. يلا على المسخن.
أبو شلبك : تفضلوا على الميسور.. بعدين بنكمل.
إنتهت .
