– اللغة المستخدمة: الفصيحة وبعض اللهجات العربية المحلية.
– عمل أبو شلبك اليوم : قاعد عواطلي.
– المناسبة: أجواء كورونية.
– الزمان : ليلة 27 من شهر آذار- مارس 2020 .
– المكان: تحت شفاط مطبخ وامام شاشة الكمبيوتر في بيت ابو شلبك
– المشاركون : زملاء مدرسة المهاجرين المغلقة حتى ربنا يفرجها..
***
كتب : محمد هارون
——————————————————————————
أبو شلبك في بيته عازلاً نفسه تنفيذاً لتعليمات حكومتة المحلية وهي زوجته سوزان ( أم شلبك سابقاً ) ومعلمته كارولين ، يجلس تحت شفاط المطبخ ومتأبطاً بربيش الأرجيله بنهم وعشق خرافي .. بينما أم شلبك في صالون البيت تتحدث بالتلفون الأرضي .. تنهي المكالمة وتدخل المطبخ.
أبو شلبك : مع مين صار لك ساعة بتبربري وبتحكي بالانجليزي !!؟؟ .
أم شلبك : هاي المعلمة كارولين كانت معي الخط وبتسأل عنا .. وبتتحسر على تاجيل عرض نشاطنا الفني اللي كان من المفروض يكون بكرا الجمعة 27 الشهر .
أبو شلبك : ما كل ما يتمنى المرءُ يدركه … تجري الرياح بما لا تشتهي السفن .
أم شلبك : طيب يا أيها المتنبي .. المعلمة بتقترح نتابع دروس الانجليزي للكبار عن بُعد بالتلفون.
أبو شلبك : خلينا بهمنا اليوم .. ما بدنا دروس لا عن بُعد ولا عن قُرب.. احنا ما صدقنا تيجي الكورونا ونرتاح من المدارس !!
أم شلبك : احكي عن حالك… أنا والزملاء نرمين وسالم ومصيب وغونزاليس وفادي والزين عنا الدرس الأول بكرا الصبح على الاسكايب .
أبو شلبك : ليش باقي طلاب الفصل وين ؟
أم شلبك : ما بردو على تلفونات مس كارولين!! و “زيهاو” عالق بالصين مش عارف يرجع لكندا
أبو شلبك : الله يهدي بال الجميع .. بس أنا قبل شوي كنت بطق حنك مع ابو صفوح وامبارح بالليل قضيتها سهران على التلفون مع أبو الشكر .
أم شلبك : هذول شلتك من عباقرة الانجليزي ما بدهم يتعلموا .
أبو شلبك : طيب هسا قومي اعمليلي ابريق شاي بمرمية واقلي جوز بيض عيون بزيت زيتون وحطي جنبهم جبنة نابلسية وقطعي زر بندرة و .. (تقطعه ام شلبك).
أم شلبك : يقطع هالشغلة .. يا زلمه من نص ساعة ادلغصت و افطرت صحن فول وفحل بصل ونص كيلو زيتون .. شو الدعوة ؟؟
ابو شلبك : يا ستي ..شو في ورانا … المدرسة ومسكّرة والدنيا والشغل مزطم و برة مكورنه.. خلينا نتسلى … ( موبايل أبو شلبك يرن ) الو .. اهلا أهلا أبو صفوح يا غالي .
ابو صفوح من الموبايل : بدك ما تآخذني يا ابو شلبك .. على اللي عملته مرتي معك ومع شكري ليلة امبارح .
ابو شلبك : خلص يا إبن الأوادم .. من نص ساعة اعتذرت اللي كم مرة بدك تعتذر.. معلش بتصير باحسن العائلات .. انسى الموضوع .. تعالوا اسهروا عنا اليوم ولا تهتم .. بعد شوي بحكي مع الشباب .. بتشرفوا الليلة .. خلص الله معك .
ام شلبك : خير شو صار معك امبارح عند بيت أبو صفوح .
أبو شلبك : انتِ بتتصنتي على التلفون !! .. ما في شي .. ام صفوح عصّبت علينا عشان بنأرجل في نص البيت وصوتنا طالع وما عرفت تنيّم بنتها الصغيرة … وطردتنا!!
أم شلبك : حقها طبعا .. وانا عندي هون ممنوع .. انتو مطرودين من القهاوي لتدخنوا في البيوت!! .
ابو شلبك : اسمعي انا مقبعة معي من الصبح .. ومخنوق من يوم ما منعتيني اطلع برة .. كمان ما اشوف اصحابي ؟
ام شلبك : طول بالك يا بعلي وتاج راسي .. انت لازم تشوف صحابك بس على طريقة الحكومة ؟
ابو شلبك : شو يعني .. يعني المشاريب على حساب الحكومة ؟
أم شلبك : لأ .. اللقاء بيكون على النت خوف من الفيروس .
ابو شلبك : يا شيخة سيبك .. هو انا كمبيوتر ليهاجمني فيروس.. هيّ الناس مبطّحة على البحر وبتتمشى بالشوارع وما حدا سائل .. !!
أم شلبك : والله هظولا الناس بدهم الزعيم الصيني المؤسس ماوتسي تونغ ليعلمهم النظام .
أبو شلبك : الله يرحمك يا رفيقي يا ماو .. وين نلاقي متلك!!.
ام شلبك : طيب التزم بافكاره زي ما جماعته التزموا ونجحوا بالقضاء على الفيروس .
أبو شلبك : رجعتي تقولي لي فيروس .. خلص بكفي .. انا طالع أكب الزباله !!
أم شلبك : ما ظل عنا زبالة .. صرت كاببها تلات مرات من الصبح …
أبو شلبك : مفرفطة روحي يا زغاريت .. مش عارف شو اساوي؟؟ فقعت مراررتي !! .
أم شلبك : يا زلمه قوم اقرا كتاب أو مجلة.. العب رياضة منزلية.. أو احكي مع اولادنا باتاوا .
أبو شلبك : حكيت .. بس ما حد برد .
أم شلبك : الاولاد ( بيزي بيزي ) شوشو صيدلي ولولو طبيبة ومشغولين بهيك وضع وبهاي الأيام … اعذرهم .
أبو شلبك (بعصبية) : ابني اسمه شلبك وبنتي اسمها لواحظ وانتِ اسمك زغاريد مش سوزان.. واللي مش عاجبه يروح على يوهان بلاش يوهان … يروح على ايطاليا او اسبانيا أحسن !!.
أم شلبك : طيب هدي هدي شوي .. تعال نلعب ورق ..طرنيب ماشي ؟.
ابو شلبك : بنفعش لازم اربعة .. خليها للمسا لما يشرفونا الشباب .
أم شلبك : لا يمكن .. كله على الاسكايب وبس .. فاهم!! .
***
مساءاً.. أم شبلك تضبط شاشة الكمبيوتر مع الكاميرات وتفتح الاتصال مع الزملاء في بيوتهم .. ابو شبلك يجلس مشدوهاً . …عبر الشاشة ..
سالم : مساء الخير عيوني أبو شلبك والزميلة أم شلبك .. إشسويت بالحشرة أغاتي أبو شلبك والله طرقاعة ؟
ابو شلبك : حيا الله دكتورنا الغالي ابو الُسلم .. ليش قاعد في البيت .. ما تروح تتطوع بالمستشفى وتساعد المرضى بدل القعدة على التلفونات والاسكاتينغ ؟
أم شلبك ( بعيدا عن الكاميرا وبصوت منخفض ) : اسكايب مش اسكاتينغ!! وبعدين سالم ما بعرف انجليزي كويس لا تحرجه.
سالم : حبيبي ابو شلبك انا قلت من اول …انا خريج اوروبا الشرقية وانا شغال على معادلة شهادتي .
( مصيب يظهر على الشاشة )
مصيب : هلو شلبكس هلو سوووزان هالو نرمين هلو سكري هلو سلومي هلو كلش .
سالم : أنا زين والحمد له … بس أنت وراي وراي في الكويت ودبي ولاحقني بعد لكندا في المدرسة والاسكايب كمان .
شكري : انت اه اللي جابك هنا ؟ .. ميت مرة قلت الك شكري مش سكري .. عموما ازيكم يا جماعة انتو وحشني.. مش المدرسة.. ابو شلبك ازيك وازاي الحجة ام شلبك وازاي صاحبك أبوعلاء ؟ .
ابو شلبك : خليني ارد عليك بالتدريج .. الجميع كويسين ولولا هذه الجائحة الجائعة لكنا بالف خير .
شكري: ايه هو الي جعانة .. هو الواحد بيعمل ايه غير بياكل اليومين دول.
ابو شلبك : شو هو الي جعانة يا زلمة .. هاي فصحى! وبعدين مين أبو علاء صاحبي ؟
شكري : نسيت شاعر الفلاسفة وأيام السجن .
ابو شلبك : طيب .. بعدين بعدين !!
ابو صفوح : اه بعدين خليلي دور احكي .. مساء الخير يا حلى ناس .. كيفكن .. خاصة مع الحبسة والعزل الإنفرادي والارادي .
ام شلبك : الحمد لله … كيف المدام يا بو صفوح .. كيف مقضين وقتكم ؟
أبو صفوح : الحمد لله .. لكن اقتصاديا متبهدلين ما في شغل ولا مشغلة و”الأوبر” مأبور .. اجتماعيا مخنوقين بس مطبخياً تمام .. عملتلنا ام صفوح تبولة وكبة نية وكبة مشوية وبوريك وورق عنب ..( يقطعه شكري )
شكري : اه الصورة الكبيرة الحلوة اللي وراك.. اقرب الكامير ..ده حبيبك ترودو!! .
ابو صفوح : ايواه .. هذا جاستين ابو بيير .
شكري : طب الأكل وضعه كويس .. أخبار ورق التواليت معاكوا ايه؟
ابو صفوح : الي يومين عم دوّر ما فيه .. شو بياكلوه!
شكري: ما عرفش .. الحمد الله على نعمة الشطّافة !!
سالم : عيوني ابو الشكر هذا بيزنس اكبر منك ومني .
أبو صفوح : هلق خلينا بالموضوع .. شو رايك يا ابو شلبك وانت مختارنا وكبيرنا … كيف بدنا نتجاوز هالمحنه ونخلص من الكورونا .
أبو شلبك : والله … ( يقاطعه سالم بقوة )
سالم : يا جماعة مع احترامي لأخي ابو شلبك .. ضروري نوجّه الاسئلة بالاتجاه الصحيح . المفروض انا دكتور الانف والاذن والحنجرة .. اجاوب .
شكر : انت مال اهلك متعصب كده .. تفضل يا سيدي .. جاوب ان كنت عارف .
أم شلبك : اخوي عارف حبيبي .
ابو شلبك : وبعدين …بلا من عارف هسا .. تفضل جاوب يا د. سالم .
سالم : بهيك وضع .. انا ممتن للزميلة ام شلبك اللي اصّرت ان نلتقي على الاسكايب وهذا افضل للجميع .. والحقيقة لا يوجد عقار أو تطعيم جاهز لهذا البلاء لذلك ليس لنا الا الانتباه من خلال غسل الأيدي واستعمال المطهرات وبناء جهاز مناعة قوي وفيه خبير صيني بقول ان استنشاق بخار الماء يقتل فيروس كورونا .. اذا كان موجود في الرئتين أو الحنجرة أو الأنف لأنه ما يتحمل درجة حرارة بخار الماي الدافية .
أبو صفوح : الله محيو دكتورنا الفهمان.. والله يا اخي غير لما يجي كلام العلم من واحد منا وخاصة انه الوضع تعبان وكتير شغلات بهالدنيا راح تتغير .. وكمان شوارب كتير راح تطير ولا راح يبقى عميد ولا عقيد .
سالم : يا حيا الله بمعتز شو اخبار الوالد أبو عصام ؟
ابو صفوح : ليك اتركنا من باب الحارة والمسخرة هلق .. شحو مصيب بده يحكي .. تفضل .
مصيب : ثانكس ابو صفوح … اسمع انا أبا ارمس واتكلم مع سالم ..أنت سالم رفيق مال انا تمام .. بس طال عمرك كلامك متروس منه في التلفزيون.. و ما في معاك معلوم جديد .. وخلي تلفزيون مال انت يولي .. انا اقول سيدا بدون مني مني .. انه المشكل في العالم الحين ما هو كورونا ولا تويوتا كورولا .. المشكل هو جنجال مخفي تحت الميز والتيبل .. كله من شان يساوي بيزات حق الميدسن والمطعم .
أبو شلبك : التطعيم مش المطعم … بس ما شاء الله عليك مصيب أنت مفخرة للهند ولمدرستنا في كندا .. انا مع هذا التوجه .. في مؤامرة لتدمير الصين اقتصادياً بتوجه امبريالي بقيادة الترامبية الحديثة .
شكري : أنا ما فهمتش من كلامه حاجة .. يعني انت فهمت كل اللي حكاه المصيبة ده .. وبعدين حضرتك اتحفتنا بتعقيب واضح اوي !!.
الزين : ازايكم يا ناس يا عسل .. والله ياعمنا يا ابو الشكر … كلام ابو شلبك ومصيب خطير لأن نظرية المؤامرة كبيرة ولكن تحتاج للاثبات حبتين.. ما حد فاضي يتكلم فيها .. الاستباله كلها مرضى والناس مرعوبة .. آخ آخ وين الأيام السمحة ؟
فادي : بنسوار الكن كليكن .. بتعرفوا هذا الوباء اله فوائد كمان ..
الزين : خبرنا يازول ؟؟
فادي : يعني مثلا: انتشار فكرة التعليم عن بُعد ونشر ثقافة العمل من المنزل وأهم شي هو تخفيض نسبة التلوث في السما والارض وغيرهم كتير.
أبو صفوح : يعني نترجى الكورونا تبقى معنا .. طيب ونظرية المؤامرة ؟
فادي : ياعمي ما حدا قال هيك .. وطبعا ما فينا نثبت او نلغي هاي النظرية .. لكن لاحظتوا معي انه وقفت ثورات الشباب بلبنان والعراق وكلام الشماته تبع ترامب بالصين .
نرمين : مساء الخير … معلش اتكلم .. احنا يا ريت نترك المؤمرات ونبقى في اللي احنا فيها .. نخلص من المشكلة دي و نشوف نعمل اه مع العيال في البيوت .
أم شلبك : هذا الكلام المفيد.. انتِ شو عملتي ؟
نرمين : همه يا عيني محبوسين وعايزين يطلعوا بره .. لكن ما باليد حيله.. بصلي وبدعي ربنا يشيل الوباء ده .. و بدرب العيال ازاي يصبروا .. وكمان بنعمل العاب موجوده على النت بنتسلى بيها .. وعندي كتب وشرايط تعليم اللغة العربية.. وطبعا التلفزيون الي ماخد معظم وقتهم .. طيب حد فيكم عنده اقتراحات ؟
أبو شلبك : دورك عظيم يا نرمين .. الوضع صعب على الصغار .. الله يعين البلاد اللي فيها الحصار وقطع الكهربا والمي دايماً .. وفق هذا كله بتجيهم القنابل من فوق روسهم نار نار.
سالم : الحمد لله على كل حال .. احنا عنا كهربا ومي ونت يعني حصار دايت .. ازمة بسيطة وبتمر.
شكري : انت بتهرج .. اه حصار دايت وانا لا شغل ولا مشغلة .. اعمل اه .. انا اروح فين.. ادفع الموركج ازاي ؟؟
نرمين : ترودو وفورد والجماعة بيقولوا في تعويضات … الصبر طيب يا بلديتنا .. كل مشكلة وليها حل .. لكن أهم حاجة لازم نلتزم في بيوتنا بشكل كامل عشان الصغار والكبار ما يجيهم الوباء وزي ما قالوا بتوع زمان .. درهم وقاية خير من قنطار علاج .
أبو شلبك : كلامك صح … خلينا نفترق شوي عشان نلتقي عن قريب .
نرمين : يا رب نخلص عن قريب .
أم شلبك : قادر يا كريم.
***
انتهت
