العنوان : أبو شلبك يحاور كوفيد 19 من جديد
المكان : مكتب الجريدة
المناسبة : عودة الإبن الضال!!
اللغة المستخدمة : الفصيحة والمحكية .
عمل أبو شلبك: صُحفي .
الزمان : سنة ثانية ب. ع ( بعد كورونا) .
***
كتب : محمد هارون
رسم : ياسين الخليل .
***
أبو شلبك مشغول في الكتابة ويتثاءب ويقول: … وبعدين تعبت .. ضجت… كل المواضيع والأخبار والصور عن الكوفيد ..كل كم يوم متحور ومتحول ،رح نموت ، طلعت روحي والناس ملت زهقت .. (التلفون بجانبه يرتج )
أبو شلبك قبل ان يرد على التلفون : وانت ليش بترج خايف من الكورنا كمان ما خلص الكل تطعم وتعقم ..خير ان شاء الله لنشوف مين .. الو أنا ابو شلبك مين معي .
المتصل : أنا كوفيد 19
أبو شلبك : مين يا روحي .. مين يا خالي احنا خلّصنا رمضان زمان ومافيش كاميرا خفية.
المتصل : شايفني أخوك الصغير لتقولي كاميرا خفية، بقولك أنا كوفيد 19 !
ابو شلبك يبلع ريقه : ( يلتفت للتلفون ) نعم يا كوفيد يا 19 خير ان شاء الله .
المتصل: أنت اتصلت اللي قبل شوي وهذا رقمك طلع عندي…( بقوة ) بعدين لوسمحت احنا ما عنا وقت.
ابو شلبك : ” يخاف ” الله يعدمني نظري يا غالي.. بالغلط والله بده يكون بالغلط.
المتصل: كيف يعني بالغلط ؟.. انت تركت لي ” مسج ” بتقول انك حابب تعمل معي لقاء للجريدة .
أبو شلبك : يا سيدي تيّست العفو منك !!
المتصل : حاشاك حبيبي .. كمان انت طلبتني وتركت رسالة.. , وبهيك انت ممكن تنصاب بكورونا ..
( بحنان ) وبعدها بندوب مع بعض وتصير ( بوزتيف) يا حلو .
ابو شلبك.. شو ؟؟ انا ما لمستك ولا شوفتك حتى ..كيف ممكن انصاب ؟؟.
المتصل : من التلفون !!. منتوا بتقعد تعقموا ايديكم واجريكم و الخضار و اللحمة وكل ما بتشتروه، وبتنسوه تعقموا التليفون ..وكأنه التلفون عليه خرزه زرقه وما بنصاب ! يا خي بشر غريبين !
ابو شلبك : انت هبيلة ولا بتستهبل .. انت من وين طلعت النا .. يا فيروس يا ابن السته و…
المتصل : بس ولا .. أنا ضيف عندك، هيك بتعامل الضيف .. ولعلمك غيرك كثير حاولوا يعملوا معي لقاءات وانا رفضت .. حتى روح اسال لاري كنغ .
ابو شلبك: أسال مين روحي ..يا روح ما بعدك روح ؟؟
المتصل : طيب .. يلا اعمل معاي لقاء سريع و خليني أمشي.. عندي مشوار لمناخير واحد!!!
ابو شلبك: شو يعني بدك ايانا نرحب فيك وانت بتموت الناس .
المتصل : (بنبرة حادة ) يا زلمة شو هالدراما .. أنت فكرت قديش انتو قتلتوا بشر من غير واسطتي .. أنا على الأقل لما دخلت حياتكم صرتوا تغسلوا ايديكو ميت مرة باليوم .. وساهمت في محو الأمية وتتعلموا لغات .
أبوشلبك: نغسل ايدينا وفهمنا .. كيف تعلمنا لغات؟ ..
المتصل: منت لما تغسل ايديك، عشان ما تعد للعشرين شو بتصير تعمل؟ … بتصير تغني “هابي بيرزدي تو يو . هابي ..
أبو شلبك مغنيا أيضا: هابي بيرزدي يا …. الله يلعن وين وديتنا .. طيب .. حسألك سؤال واحد بس ..انت ايش بدك منا بالزبط؟
المتصل: انا ما بدي شي .. انتوا الي مصممين تتباوسوا وتتعابطوا حتى الموت.. مشفتش جنس بشر بحب التزليق والتعبيط والتشيش مثل جنس البشر ..
أبو شلبك: طب اسمع حل عني و عنا ..
المتصل: انت اسمع .. تعال خدلك عطسة ..
أبو شلبك: بتستهبل ..
المتصل: عطسة صغيرة تعال..
أبو شلبك: ولك ابعد عني .. يا عالم ياهو يا who .. يا منظمة صحة الحقوني .
المتصل : (يعطس بصوت عالي ) ..
أبو شلبك: غرقتني ..الله يسخطك ..اعتقلوه احبسوه!
( يصحو مفزوعا من النوم وهو ما زال على المكتب) الحقوني (صوت أخف ) الحقوني (اخف ).. اعوذ بالله من الشيطان الرجيم .. يا لطيف يا لطيف..يا لطيف .. بس أنا لسة صامد و مصرّ على أنه ناخد بالنا ونلتزم بالتعليمات رغم كل المتحورات والديناصورات .. صحيح هي صعبة وممله ، لكن مكره آخاك لا بطل المهم ما نرجع لإغلاق الكامل .. إحنا مش ناقصين !! .
