العنوان : البحث عن عمل
اللغة المستعملة : الفصيحة والمحكية .
مهنة أبو شلبك : مُنزِّه كلاب dog walker
المكان : ضواحي تورونتو
—————————————————————–
(أبو شلبك وعائلته في بأطراف تورنتو ويبدو أبو شلبك منزعجا )
شلبك : يا بابا.. يا حج قول الحمد لله … فلوس وعندك والصحة ما شاء الله… لشو هالنكد ؟
أبو شلبك : عُمر الفلوس ما كانت مشكلتي … من يوم جيت لكندا وحتى بعد وصولي ولأكثر من ثلاث سنين وانا بصرف من جيبتي.
إبنته لواحظ : يا بابا ما حدا حكى شي… بس احنا بنحاول نشوف ليش معصّب وحزين.
أم شلبك- زغاريت : ما هو طول الليل على التلفزيون والمحطات العربية اللي كلها أخبار منّيلة وهموم … وما فيها اشي يسر ويفرح … من فلسطين لسوريا للعراق كله تعبان… الله وكيلكم عابط الأخبار وحاضنها .
أبو شلبك: شو بدك أعبط يعني… هيام وهبة ولا محبوس العرب ؟
شلبك : من وين بتجيب هاي الأسماء ؟؟ المهم احنا بدنا اياك مبسوط دايماً .
لواحظ : بصراحة بابا مالل ومفرفطة روحة من يوم ما ترك الشغل .
شلبك : ما انتِ شوفتي له شغل جديد، وهو رفضه على طول .
أبوشلبك : اللي بدري بدري !!! قال شغله جديدة قال !! أشتغل أدلل وأنزه كلاب …(دوق ووكر ) يا .. يا عيب الشوم .
أم شلبك- زغاريت : يا صابر يا جوزي وبعلي وتاج راسي .. انت زلمه كبير بالسن ولغتك الانجليزية وبدون زعل شوية تعبانه . …شو بدك تشتغل ؟ يعني بدك تقعد محل ترودو!! .
أبو شلبك : ترودو يا ولية .. أصلاً انتِ سبب الورطة اللي انا فيها … ما كنت قاعد ومبسوط في البلاد وما حدا مثلي . قولتي بكندا المستقبل … بكندا الشغل…وينه الشغل ؟؟
شلبك : يا حج أنا بعرف كتير ناس غيرت مهنتها للظروف الجديدة في كندا .
ابو شلبك : بس مش تبع كلاب !!
شلبك : مهنة شريفة وعادية وكل الناس بتشتغلها بكندا … وانت بتقول دايما عبارة (بتفضل الكلاب على كثير ممن لبس الثياب)!!
أبو شلبك : اولا مش أنا صاحب هاي العبارة … وثانيا انا فعلا للاسف عشت واشتغلت مع ناس، الكلاب أحسن منهم. .. بس ذنب الكلب بيظل أعوج… ومن الآخر .. مش راح اشتغل وزير سياحة لكلب !!
أم شلبك : يازلمة حيرتنا معك .. على كل حال لا تنسى كلب يعوي معك ولا كلب يعوي عليك.
ابو شلبك : يا عمي الكلب للحراسه بره البيت… يروح الصيد.. يمشي في المرعى أمام الغنم …. مش امامي أنا….أجمع والملم قرداته وبلاويه وأحطها بكيس. … ( يرفع صوته ) وأخيرا قالت الأعراب قديما: خاب من يرتجي من وراء الكلاب عظام.
شلبك : يعني ما في فايدة ؟
أم شلبك : صحلها جوز قالت أقرع … ماهو هاظ اللي طلعلك يا حزيط وقليل البخت ..
لواحظ : بتعرف يا بابا أنه في وظيفة اسمها “متذوق لاختيار طعام الكلاب” طبعا غير المحلات والعيادات الخاصة اللي بتعالجهم وبتوفر لهم حياة كريمة .
(ابو شلبك .. يبلع ريقه وكأنه يبلع كتلة من الشوك الجاف وتغرورق عيناه بالدموع .. ويصمت ) .
تكمل ابنته حديثها : اتذكر هذي الشغلة المتوفرة الان انها جاءت بعد واسطة .. لأنه صاحبة الكلب، جارتنا وصديقتي …. وممكن حتى ما تقبل .
ابو شلبك منزعجا : ما حد بمنن على أبو شلبك بشغلة فاضية .. قال شو!! قال مزهزه كلاب .. الدنيا آخر وقت بموت من الجوع ولا بسوّح و بمسّح ورا الكلاب.
المهم مالكم بطولة السيرة وببطولة أبوشلبك الفاضية… لأنه بعد ما خلصوا المصاري… والتوفير جف… والأولاد خففوا العطاء. .. تابعوا معنا شو صار .
أبو شلبك يجلس وحيدا يفكر ويقنع نفسه وبالفصيحة : يا أبو شلبك ..الناس التي تفقد تراثها بالطبع سوف تفقد هويتها مع الأيام ، ولهذا كله نقول بان الكلب كان ولا يزال حيوان الصيد في بلادنا وبيئتنا العربية ويصطحبه الأغنياء معهم في رحلات القنص والصيد. والكلاب التي يُصطاد بها، تتميز بالرشاقة والجمال والنظافة والوفاء والذكاء…. طيب يا أبو شلبك بس الكلب كلب ولوطوقته بالذهب…. وبعدين فيك… ما أنت بزمانك خدمت كلاب وكنت تقول لحالك كلب الزعيم زعيم .. واليوم على شو نافخ حالك ؟
يا زلمه أنزل على الشارع وخلي هالمسخم يشم الهواء .. انزل واشتغل…. يا سيدي لّثّم وجهك وما حدا عارفك … 18 دورر ( دولار) بالساعة أحسن من كل فصيلة الكلاب وكل الحيوانات الأليفة .
أقنع نفسه…
بعد أن أخفى أبو شلبك وجهه اصطحب الكلب صباحا وبيده الحبل وبالأخرى كيساً .. قابل الجيران… عرفهم جميعا .. ابتسموا له ولكن لم يعرفوه .. لكنهم عرفوا الكلب !!
في اليوم التالي قابلته ابنته زغاريت قبل ان يقوم بمهمته الترويحية عن الكلب وقالت له : بابا مبسوط بالشغل الجديد؟
ابو شلبك : نَعم… نِعم الحمد لله .
لواحظ : ما تروح اليوم على الشغل !!
أبو شلبك : قطع الأعناق ولا قطع الأرزاق .. ليش شو في… خير ؟؟
لواحظ : اكتشفت صاحبة الكلب انه ما عندك خبرة كندية Canadian experience
أبو شلبك : كمان .. المنحوس منحوس لو حطوا في !! فانوس … اجيت الحزينة تفرح ما لاقت مطرح !!
انتهت
