عابر سبيل – العدد الشهري من ساخر سبيل – ص4

عابر سبيل لهذا العدد هو الفنان والكاتب مينا ماهر.

والعبور بعنوان : العشق الممنوع…( بالدارجة المصرية )
***
واحد مستني مراته في العربية قدام المول…جات مراته و ركبت معاه…و طلعوا بالعربية!!!
الزوج: (مش طايق يبص في وشها) حمدلله عالسلامة!!
الزوجة: (مش طايقة تبص في وشه هي روخرة و قاعدة تسمع أغاني عالموبايل بسماعات و ماردتش عليه)
الزوج: أووووف….و يا ترى حانفضل عالحال دا كتير؟!
الزوجة: ( مصدراله الطرشة تمام)
الزوج: (بعصبية و هو مركز في السواقة) شوفي يا سوسو…الناس كلها بتتخانق!! و مصارين البطن بتتعارك…و البيوت ياما فيها…بس تفتكري هي دي الحياة؟! هو دا اللي انتِ عايزاه…اننا ندمر حياتنا بنفسينا؟!
الزوجة: ( غمضت عنيها و هي بتسمع أغاني عشان تريح أعصابها و برضه ما ردتش عليه)
الزوج: ( عينه عالطريق) يا بنت الحلال…اقصري الشر و خلينا ناخد و ندي!! مش ممكن كدة ابداً!!!
(مافيش فايدة)
الزوج: أووووف…(و فضل مكمل سواقة و هو ساكت)!!!
الزوجة: (مافيش شوية الزوجة موبايلها يرن تبص فيه و تستغرب!) انت بتكلمني ليه و انا جنبك؟! و اول ماتبصله تصرخ) يا نهار اسود!! إنت مين؟!
الزوج: ( يتخض و يبص عليها اخيراً) ايه دا؟! مين حضرتِك؟!
الزوجة: يا نهار اسود…انت خاطفني ولا ايه؟! دا انا حاطيِّن عيشتك!!!
الزوج: (و هو مرتبك) يا فندم… خاطفك ايه بس؟! هدي نفسك! كل ما في الامر إني كنت مستني مراتي…و حضرتك إظاهر ركبتِ بالغلط و انا ما اخدتش بالي و طلعت!!!
الست: و إزاي يعني سقت كل دا من غير ما تتأكد مين ركب معاك؟! دي حكاية ماتتدخلش العقل…انا حابلغ البوليس!!! (تمسك الموبايل عشان تكلم البوليس)
الراجل: يا فندم استهدي بالله، مالحال من بعضه حضرتك برضة مابصتيش في وشي غير دلوقتي!! يعني بتحصل!!! (تليفونه يرن)
الراجل: و اهي مراتي بتتصل بيَّ أهي عشان تصدقي!!!
الست: (بصريخ) طب وقف العربية…وقف العربية حالاً!!!
الراجل: (يركن على جنب) اتفضلي اهو…بس الحتة دي مقطوعة و مش أمان…حضرتك ممكن تكلمي جوزك من هنا و انا مستني مع حضرتك!!!
الست: يا حلاوتك…و عايز جوزي بقى يشوفني معاك في عربية واحدة لوحدينا و عادي كدة!!!
الراجل: يا فندم دا سوء تفاهم وارد و اكيد جوزك حايفهم!!
الست: جوزي مايفهمش الكلام دا…و احنا أساساً متخانقين…دا مش بعيد كمان يكون دمه شايط لاني لاطعاه كل دا!!! و عشان كدة بيتصل!!! (يرن موبايل الراجل)
الراجل: دي مراتي تاني…هي كمان شكلها حاتقتلني لاني مش مستنيها!!! و احنا اصلاً برضه متخانقين!!!
الست: طب ما ترد عليها!!!
الراجل: اقوللها ايه؟ معلش يا حبيبتي اصلي انا اخدت واحدة ست تانية غيرك!!! دي كان يبقى فيها طلاق رسمي! ( الموبايل يبطل رن)
الست: انا عندي فكرة!!! كلمها و قول لها انك متأخر شوية…و السكة زحمة وكدة!!!
الراجل: فكرة برضه…و اهه قضا اخف من قضا!!! طب و انت حاتعملي ايه؟!
الست: حاكلمه انا كمان و حاقول له اني لسة في المول و ماخلصتش…اهي ارحم من انه يشوفني معاك!!! و احنا نرجع تاني عالمول و من سكات انزل و لا من شاف ولا من دري!!!
الراجل: تمام…(على مراته) الو ايوة يا حبيبتي…ايه؟! انتِ لسة في المول و ماخلصتيش؟! (يبص للست بسعادة)!! طيب ماشي…خدي وقتك!!
الست: (تتصل بجوزها) الو…ايوة…معلش ماسمعتش التليفون…خير؟! ايه؟ انت متأخر شوية؟! و الدنيا زحمة؟! ماشي سلام(تقفل السكة)!! متأخر شوية الاخ!!
الراجل: طب كويس…جات من عند ربنا أهي!!!
الست: من عند ربنا!!!؟؟ اما انت طيب قوي بشكل!!
الراجل: مش فاهم!!
الست: معقولة مش فاهم، ان جوزي و مراتك مع بعض هم كمان دلوقتي!!!
الراجل: مع بعض ايه بس؟! يعني معقولة يحصل نفس الموقف لأربع أشخاص بنفس الطريقة!!! لا يمكن!!!
الست: ليه هي مراتك قالت لك ايه؟
الراجل: انها لسة في المول و ماخلصتش!!!
الست: و انا كنت حاقول لجوزي ايه؟
الراجل: انك لسة في المول و ماخلصتيش!!!
الست: حلو…و انت كنت حاتقول لمراتك ايه؟
الراجل: اني متأخر و الدنيا زحمة!!!
الست: و جوزي قال لي ايه؟
الراجل: انه متأخر و الدنيا زحـ…..يا نهار اسود!!!
الست: شفت بقى!!!
الراجل: طيب ما لو دا صحيح فعلاً …فهو موقف زي الزفت و ببحاولوا يحلوا الموضوع من غير خساير!!!
الست: طب بيكدبوا ليه؟!
الراجل: ما احنا برضه كنا حانكدب زيهم!!!
الست: بس ما كدبناش!!!
الراجل: حد عارف…ما يمكن هم برضه يكونوا صادقين فعلاً و كل واحد لوحده و احنا بس اللي ظنانين!!!
الست: يقوموا يقولوا نفس الكلام اللي احنا اتفقنا عليه بالملِّي!!؟ بيتهيألي واسعة شوية!!!
الراجل: ايوة يعني انتِ عايزة ايه دلوقتي؟! نرجع المول و لا نفضل هنا؟ ولا ايه بالظبط؟!
الست: حانرجع المول طبعاً عشان نمسكهم متلبسين!!!
الراجل: متلبسين ايه؟! هي كبسة آداب!!!
الست: إخلص…قوللي…هي مراتك شكلها ايه؟
الراجل: اشمعنى؟!
الست: يعني ممكن جوزي يبصلها؟!…مالآخر… حلوة؟! احلى مني يعني؟!
الراجل:…هههههه…طبعاً ايش جاب لجاب؟!
الست: اما انت بجح صحيح…
الراجل: ما فيناش من زعل!!! نتِ سألتيني و انا جاوبتك!!!
الست: (تتظاهر انه مش هاممها) عالعموم جوزي برضه طول بعرض و عنين ملونة!!!! جاجة كدة تملا العين…مش مقفع في روحه زيك!!!
الراجل يبصلها … و فجأة يفطسوا هم الاتنين على روحهم مالضحك!!! عيل صغير يمشي ناحية العربية وهي راكنة و يخبَّط على شباك الست و هم بيضحكوا…ففتحوا الشباك…
الواد: بابا…ماما…
الاتنين: نعم يا حبيبي…
الواد: تيتا بتقوللكم يا ريت تبطلوا الهطل اللي بتعملوه كل يوم دا و اطلعوا بقى عشان الاكل حايبرد…و بتقوللكم برضه ياريت تبقوا تردوا على موبايلاتكم لما نتصل بيكم…جاتها نيلة اللي عايزة الخلف!!!