شباك ابو شلبك
العنوان : عودة الحجاج وسوالف زمان وسوالف اليوم
المناسبة : انتشار الِملل والِنحل والنعرات والثغرات
نشاط ابو شلبك: مُختار
اللغة المستخدمة : العربية الفصيحة ولهجات عربية متنوعة.
الزمان : قبيل الانفجار
المكان : مركز أمني عربي
كتب: محمد هارون
***
جزء من حوار كان يجري سابقا:
جريس ( ابو حنا) : الحمدالله على سلامتك وحج مبرور يا عمي أبو شلبك .
ابو شلبك : الله يسلمك ويطول عمرك… طمني على الأهل… ان شاء الله كلهم بخير؟
جريس :الحمد لله كلهم بدعو بسلامتك. انت طمني على بقية الحجاج ابو العبد ومرته وام البتول وأخوها فضل وكل الي كانو معاك…..يا حج صابر.
ابو شلبك : كلهم بخير …وبعدين اول مرة واحد بناديني بالحاج صابر …الله يطعمك زيارة القدس ان شاء الله
جريس : ربنا كبير وانشاء الله بنزورها محررة سوا …. ترى اليوم عشاك وكل العيله عندي.
أبو شلبك: ربنا يطول عمرك بكفي الاستقبال اللي عملتو الي وانا راجع من الحج.
جريس : خيرك سابق يا عمي ابو شلبك …انت صاحب واجب.
جزء من حوار يجري حالياً:
أبو شلبك في مركز أمني ومعه مجموعة من رجالات الحارة : بعد طوشة بين ابناء الحارة الواحدة عقب مباراة ( فطبول) وفي محاولة لإخراج المتصارعين وهم سفيان ( ابن ابو العبد) وعباس
( ابن ابو حيدر ) وحنا (ابن جريس) من المركز الامني بكفالة …. الضابط يسأل ابو شلبك :
الضابط : انت شو علاقتك بالجناة؟
ابو شلبك : انا جارهم وكبيرهم وبمثابة والدهم.
الضابط: ( يتمسخر ثم ينفعل ) كبيرهم …هاه… في كبير واحد في البلد بس…..طيب انت خليك بحالك أحسن ما احشرك معهم …فاهم!!
أبو شلبك: يعني… ما في داعي نكبر الموضوع ..الحكاية طوشة بعد لعبة (كورة).
الضابط: ( يتهكم) تفضل يا سيادة العميد اقعد محلي … والاّ شو رايك أصورك واحط صورتك فوق راسي محل الزعيم الكبير؟ … لدينا حالة اعتداء على الممتلكات العامة وتكسير بوابة مسجد وسور كنيسة وتحرش جنسي في مكان عام ….(وبتقلي كورة وفوطبول).
من بعيد الأولاد من خلف القضبان : كلام مش صحيح الطوشة حول الملعب ( ينهال عليهم الشرطة ضربا فيسكتوهم)
ابو شلبك : يا عمي على مهل… اولادنا ما بعرفوا هيك قصص واحنا ربيناهم على التسامح والمحبة …زي ما ابوك ابو عوني ما رباك يا ولد ياعوني …بتفكرني مش عارفك!!
الضابط : لو سمحت عمي ابو شلبك هذا مكان عمل… وانا في المخفر، رقم عسكري فقط وانفذ الأوامر …وامامي تقرير جاء من جهات عليا بتفاصيل الحادثة .
ابو شلبك : انت بتصدق ورق وسخ و مصدي، وبتكذبني يا عوني !!!
الضابط عوني: ( يضرب كلتا يديه على الطاولة) يا عسكري ضع الختيار ورا الشبك واشحط الشباب لعندي ….( ينفذ) وخذ هذه الأوراق ووزعها عليهم… ليجيبوا عليها كتابة وبعدها يوقّعوا …واذا رفضوا التوقيع … انت بتعرف كيف تخليهم يوقعوا!! واول شي اقرأها بصوت عالي من شان الكل يسمع :
الشرطي يقرأ من الورقة : أجب عن الاسئلة التالية جميعها …
س1: الاسم والعُمر . مكان وتاريخ الميلاد . الاصل والجنس. لون الشعر والعيون والبشرة. الطول والعرض والوزن . محيط الخصر والكتفين . رقم الحذاء . حالة الاسنان والاظافر. القدرة على الإنجاب.
س2: ضع خطا تحت الإجابة التي تناسبك: الديانه : الاسلام – المسيحية – ملحد – علماني- غير ذلك.
اذا كنت مسيحيا هل انت : كاثوليك – ارثوذكس شرقي – غربي – بروتستنت – غير ذلك.
اذا كنت مسلما هل انت : سني – شيعي – درزي- أباضي – أحمدي – بهائي- غير ذلك.
اذا كنت سنيا هل انت : حنبلي – شافعي – مالكي – حنفي – غير ذلك.
اذا كنت شيعيا هل انت : اثنى عشري – اسماعيلي – زيدي – علوي- غير ذلك .
أبو شلبك ( يقاطعه من خلف الشبك) سجل عندك يا واطي… اجاباتنا …غير ذلك… في كل الاختيارات …واحنا عرب وربنا واحد وعدونا واحد ومعروف …بتعرف مين هو وو … هو اللي اعطاك الاسئلة يا عوني… أنت عونهم مش عوني ..انت واحد تافه واللي عيّنك مدير مركز امني واحد اتفه منك ولك روح ابلش بالناس اللي ورا النهر وخابطين على راسك وراس اللي اكبر منك ..ولك أنت واحد اخو ….!!!
فاصل ونتوقف بعده حفاظا على نظافة آذانكم وصفاء عيونكم.
المهم الآن … ابو شلبك مسجون ب88 مؤبد بتهمة إثارة النعرات الطائفية وإطالة اللسان والتحرش الجنسي بمكان عام!!
****
